Hópurinn birti opið bréf um þetta í síðustu viku að sögn The Guardian. „Við erum milljónamæringar og vitum að núverandi skattkerfi eru ekki réttlát. Flest okkar geta sagt að á meðan heimurinn hefur gengið í gegnum miklar þjáningar síðustu tvö ár þá höfum við séð auð okkar vaxa og fá okkar, ef nokkur, geta í hreinskilni sagt að við greiðum sanngjarna skatta. Til að segja þetta í einföldu máli: Til að endurvekja traust verður að skattleggja þá ríku. Öll ríki heims eiga að krefjast þess að hinir ríku borgi sinn hluta. Skattleggið okkur núna,“ segir meðal annars í bréfinu.
Hópurinn leggur til að tekinn verði upp sérstakur velferðarskattur fyrir ríkasta fólkið og að hann verði notaður til að berjast gegn ójöfnuði og tryggja opinberan rekstur á borð við heilbrigðisþjónustu.
Ef farið væri að tillögum hópsins þá á að skattleggja þá sem eiga meira en 5 milljónir dollara um 2% aukalega á ári. Þeir sem eiga meira en 50 milljónir myndu greiða 3% aukaleg og þeir sem teljast milljarðamæringar í dollurum myndu greiða 5% aukalega. Með þessu væri hægt að bjarga 2,3 milljörðum manna úr viðjum mikillar fátæktar að sögn hópsins.
Í Bretlandi einu myndi skattlagning af þessu tagi á 119.000 ríkustu landsmennina færa ríkissjóði tæplega 44 milljarða punda aukalega í skatttekjur á ári.
Meðal þeirra sem skrifa undir bréfið eru Abigial Disney, einn erfingja Disneyveldisins, Nick Hanauer og Gemma McGough.