Þetta sagði Lasse Enkebølle, yfirlæknir á sjúkrahúsinu í Vejle í Danmörku, í sjónvarpsþættinum „Go morgen Danmark“ nýlega. Hann sagði að nefið sé sérstaklega byggt til að anda í gegnum það og því gleymi fólk oft. Það sé mikilvægt að anda með því þar sem nefið sé með innbyggðan varnarbúnað, útvörð varna líkamans. Hann hvetur fólk því til að æfa sig í að anda með nefinu, það sé sérstaklega mikilvægt á tímum heimsfaraldurs.
Hann sagði að fólk andi oft með munninum því það sé minni mótstaða við það og því fari ekki eins mikil orka í þá öndun en það megi ekki gleyma að anda í gegnum nefið því það styrki öndunarvöðvana.
Í slímhimnu nefsins eru lítil bifhár sem flytja veiruagnir niður í gegnum kokið og niður í magann þar sem þær leysast upp í magasýru í stað þess að enda í lungunum. Bifhárin gegna því hlutverki síu. Sagði Enkebølle að það að anda gegnum nefið geti því komið í veg fyrir sjúkdóma, til dæmis kórónuveirusmit.
Hann benti fólki á að æfa sig í að anda í gegnum nefið þegar það sefur. Til dæmis sé hægt að líma límband yfir hluta af munninum til að neyða sjálfan sig til að anda í gegnum nefið. Hann sagði þetta bæta svefninn til muna og ef andað sé í gegnum nefið þá bendi ýmislegt til að það dragi úr hrotum.