Tilkynningin vakti mikla athygli í Danmörku og drottningin var töluvert gagnrýnd í fjölmiðlum. Hún var meðal annars kölluð „ísdrottning“ og „grimm drottning“ eins og DV skýrði frá í gær.
„Ísdrottningin“ – „Grimm drottning“ – Danir hugsi yfir ákvörðun Margrétar drottningar
Í gær ræddi Jóakim prins, sem er búsettur í París, við fréttamann Ekstra Bladet og var upptaka af viðtalinu sýnd í mörgum fjölmiðlum í gær. Það leyndi sér ekki að Jóakim var miður sín vegna málsins og hann gagnrýndi ákvörðun móður sinnar.
Hann ræddi einnig við B.T. og sagðist hafa fengið áætlun í hendurnar í maí þar sem kom fram að börnin mættu halda titlum sínum sem prinsar og prinsessur þar til þau yrðu 25 ára. Nú hafi þessu verið flýtt til næstu áramóta. Hann sagði einnig að börnin væru miður sín yfir þessu.
Í viðtalinu við Ekstra Bladet sagðist hann hafa fengið upplýsingar um að börn hans verði svipt titlunum fimm dögum áður en ákvörðunin var gerð opinber. Þegar blaðamaður Ekstra Bladet spurði hann hvaða áhrif málið hefði haft á samband hans við móður hans, drottninguna, þagði hann í nokkrar sekúndur, augnaráð hans flökti og hann kyngdi áður en hann svaraði: „Ég held ekki að ég þurfi að skýra það nánar.“
Lars Hovbakke Sørensen, sagnfræðingur og sérfræðingur í málefnum hirðarinnar sagði í samtali við Jótlandspóstinn að konungsfjölskyldan sé nú í krísu, þeirri stærstu síðan Hinrik prins, eiginmaður Margrétar, sagði opinberlega árið 2002 að honum fyndist sem honum hefði verið ýtt til hliðar og lítið gert úr honum.
Sørensen benti á að sjaldgæft sé að fjölskyldumeðlimur setji gagnrýni af þessu tagi fram í fjölmiðlum. Jóakim hafi gagnrýnt ákvörðun drottningarinnar og það sé mjög óvenjulegt.
