Vélin, sem fórst í gær, var af gerðinni Boeing 737 og var í eigu China Eastern. Hún tók á loft frá Kunming klukkan 13 að staðartíma og var förinni heitið til Guangzhou. Samkvæmt gögnum frá Flightradar24 þá hrapaði vélin rúmlega 20.000 fet á rúmri mínútu um klukkan 14.20. Hún virðist síðan hafa hækkað flugið í smá stund áður en hún hrapaði aftur hratt til jarðar. Hún skall síðan niður nærri borginni Wuzhou.
The Guardian segir að 123 farþegar hafi verið um boð og 9 áhafnarmeðlimir. Myndir, teknar með dróna, af slysstað sýna djúpan skurð í jarðveginum og nokkra stóra hluta af braki.
Xi Jinping, forseti, sagði í kjölfar slyssins að hraða eigi rannsókn þess en þetta er fyrsta stóra mannskæða flugslysið í Kína síðan 2010.
The Guardian hefur eftir breskum flugmálasérfræðingum að margvíslegar ástæður geti legið að baki slysinu. Tony Cable, sem starfar við rannsóknir á flugslysum, sagði að hugsanlega hafi flugmennirnir misst stjórn á vélinni eða þá að hún hafi ofrisið í mikilli hæð.
Aðrir bentu á að út frá upplýsingum um flug vélarinnar, á vefsíðum sem fylgjast með flugvélum, megi sjá að vélinni hafi verið flogið í sömu hæð og á sama hraða áður en hún hvarf án þess að neyðarkall bærist frá henni. Þeir sögðu að ákveðin líkindi séu með þessari atburðarás og þeirri sem átti sér stað þegar Airbus A320 frá Germanwings fórst í Frönsku ölpunum 2015. Þá flaug flugmaður vélarinnar henni viljandi beint inn í fjallshlíð. Allir 150 sem voru um borð fórust.
David Learmount, ritstjóri hjá Flightglobal, sagði að engar beinar sannanir hafi enn sést en það sé mikið áhyggjuefni hversu mikil líkindi eru með atburðarásinni í Kína í gær og því sem gerðist þegar vél Germanwings var flogið inn í fjallshlíðina.
