The Guardian skýrir frá þessu. Norðurkóreskir embættismenn hafa ekki tilkynnt um nein skráð tilfelli kórónuveiru í landinu en ekki er ljóst hvort veiran hefur borist þangað. Sérfræðingar hafa haft áhyggjur af gangi mála ef veiran berst þangað þar sem heilbrigðiskerfi landsins er ekki burðugt og stór hluti þjóðarinnar glímir við matarskort.
The Guardian segir að samkvæmt frétt suðurkóresku fréttastofunnar Yonhap hafi vöruflutningalest frá Norður-Kóreu komið til kínverska bæjarins Dandong á sunnudaginn. Hefur fréttastofan þetta eftir nokkrum ónafngreindum heimildarmönnum.
Ekki er vitað hvort lestin var að flytja vörur til Kína en reiknað var með að hún myndi halda aftur til Norður-Kóreu í dag með „neyðarvarning“ að sögn heimildarmanna.
Samkvæmt kínverskum gögnum hafa einhver viðskipti átt sér stað á milli landanna eftir að heimsfaraldurinn skall á en í flestum tilfellum virðist sem skip hafi verið notuð við flutninga á vörum.