Það gekk ekki alveg eftir áætlun þegar innbrotsþjófur einn ætlaði að brjótast inn í hús í Silver Springs í Maryland í Bandaríkjunum. Það var klukkan 05.30 sem lögregla og slökkvilið voru send að húsi í bænum eftir að íbúinn hafði heyrt undarleg hljóð berast frá skorsteininum.

Þar var ekki um jólasveininn að ræða né sótarann því þar var ósvífinn innbrotsþjófur á ferð sem ætlaði sér að komast inn í húsið um skorsteininn. Samkvæmt frétt Daily Star þá var hann svo óheppinn að festast í skorsteininum.

Slökkviliðsmenn þurftu því að brjóta gat á skorsteininn til að losa manninn. Sú aðgerð tók um hálfa aðra klukkustund.

Þegar búið var að losa hinn seinheppna innbrotsþjóf var hann fluttur með sjúkrabifreið á bráðadeild til skoðunar og síðan lá leið hans á lögreglustöðina.