Ísinn bráðnar í Himalaya og mun hraðar en reiknað hafði verið með. Þetta segja vísindamenn við háskólann í Leeds á Englandi. Þeir segja að afleiðingarnar af þessu séu ófyrirsjáanlegar.

Independent skýrir frá þessu. Fram kemur að þetta geti á endanum orðið til þess að 100 milljónir Asíubúa verði í vandræðum með að verða sér úti um vatn. Þetta mun einnig hafa áhrif á enn fleiri Asíubúa sem eru háðir ám til verða sér úti um mat og orku.

„Íbúar á svæðinu sjá nú þegar þessar breytingar sem eru miklu meiri en við höfum séð öldum saman,“ sagði Simon Cook, hjá Dundee háskólanum, sem er meðhöfundur rannsóknarinnar.

Rannsóknin staðfestir það sem margir töldu sig vita um bráðnun jöklanna í Himalaya síðustu áratugi, að hún sé mun meiri en áður var talið. Jöklar þar hafa bráðnað tíu sinnum hraðar síðustu áratugi en þeir hafa gert að meðaltali síðan síðustu litlu ísöld lauk fyrir 400 til 700 árum.