Líklega hafa 75.000 Bretar bankans glaðst mjög um jólin þegar kíktu í netbankann sinn. Búið var að leggja peninga inn hjá þeim, peninga sem þeir áttu enga von á. Samtals var þetta sem nemur um 25 milljörðum íslenskra króna sem fór inn á reikninga fólksins. Greiðslurnar komu í gegnum Santander bankann.

Það er því hætt við að einhver starfsmaður eða starfsmenn bankans hafi átt svefnlausar nætur að undanförnu.

Um var að ræða launagreiðslur frá 2.000 fyrirtækjum sem eru í viðskiptum við Santander. En búið var að greiða þessi laun en af einhverjum ástæðum voru þau greidd á nýjan leik. The Times skýrir frá þessu.

Það gerir málið ekki auðveldara fyrir bankann að það verður ekki svo auðvelt að ná þessum peningum aftur. Ástæðan er að margir þeirra sem fengu þessar greiðslur eru viðskiptavinir annarra banka og það þarf að beita þá banka góðum fortölum ef þeir eiga að koma að því að málið verði leyst skjótt. Þetta eru til dæmis Barclays, HSBC, NatWest og Virgin Money.

Bankarnir geta auðvitað tekið þessa peninga af reikningum viðskiptavina sinna en sumir eru kannski nú þegar búnir að eyða þeim og á þeim grundvelli verða bankarnir væntanlega ekki mjög áhugasamir um að þurfa að setja sig í samband við þessa viðskiptavini til að segja þeim að þeir séu nú í mínus á reikningum sínum.

Talsmaður eins bankans staðfesti við The Times að þar á bæ séu menn ekki áfjáðir í að taka peninga af reikningum fólks sem taldi sig eiga að fá þá.