Á þriðjudaginn var 24 ára karlmaður fundinn sekur um hryðjuverk og hvatningu til sjálfstæðis Hong Kong en dómurinn byggist á nýlegum öryggislögum sem kínversk stjórnvöld innleiddu í borgríkinu. Mannréttindasamtökin Amnesty International segja að dómurinn sé væntanlega upphafið að endalokum tjáningarfrelsis í borgríkinu sem er hluti af Kína en á að njóta ákveðinnar sérstöðu í ýmsum málaflokkum.

Það var Tong Ying–kit sem var fundinn sekur um hryðjuverk og hvatningu til sjálfstæðis Hong Kong frá Kína. „Dómurinn yfir Tong Ying–kit markar mikilvæg og ískyggileg tímamót varðandi mannréttindi í Hong Kong. Dómurinn staðfestir þá alvarlegu staðreynd að nú er opinberlega bannað að láta ákveðnar pólitískar skoðanir í ljós,“ sagði Yamini Mishra, svæðisstjóri Amnesty í Asíu, eftir dómsuppkvaðninguna.

Tong var ákærður fyrir að hafa ekið mótorhjóli á þrjá lögreglumenn og að hafa samtímis veifað fána sem á stóð: „Frelsum Hong Kong. Uppreisn samtímans.“ Þetta átti sér stað 1. júlí á síðasta ári, degi eftir að öryggislögin tóku gildi.

Refsing hans hefur ekki enn verið ákveðin hann í versta falli á hann ævilangt fangelsi yfir höfði sér.