Óhætt er að segja að blásið hafi um Anthony Fauci undanfarin misseri. Fauci skaust á sjónarsviðið þegar Covid-19 faraldurinn hófst í byrjun síðasta árs en hann var þá forstjóri Ofnæmis- og smitsjúkdómastofnunar Bandaríkjanna. Donald Trump, þáverandi Bandaríkjaforseti, dró hann inn í innsta hring Covid-19 viðbragðsteymis Hvíta hússins en öllum varð þó fljótlega ljóst að Fauci átti ekki mikla samleið með forsetanum sem stundum átti í erfiðleikum með vísindi og staðreyndir.
Fauci átti þó ekki að þykja það mikið tiltökumál að eiga við Bandaríkjaforseta, en hann hefur veitt öllum Bandaríkjaforsetum frá Reagan ráðgjöf í málefnum smitsjúkdóma.
Sýnileiki Fauci í Covid faraldrinum öllum þýddi líka að Fauci varð fljótt að skotspóni þeirra sem efast til dæmis um gildi bólusetninga, eða hafa viljað gera minna úr faraldrinum en aðrir.
Eitt slíkt augnablik náðist á myndband í gær þegar Rand Paul, öldungadeildarþingmaður frá Kentucky, yfirheyrði Fauci á þingnefndarfundi í gær. Umræðuefnið voru kenningar Pauls um hvort að Heilbrigðisstofnun Bandaríkjanna, NIH, hefði fjármagnað rannsóknir sem leiddu að lokum til Covid-19 faraldursins.
Fauci svaraði öldungadeildarþingmanninum fullum hálsi: „Ég laug aldrei að þinginu, og ég dreg ekkert sem ég hef sagt til baka,“ sagði Fauci. Paul hafði þá gert að því skóna að Fauci hefði logið að þinginu, sem Fauci svaraði strax: „Ef það er einhver hér sem er að ljúga, ert það þú!“
Slík samskipti eru ekki algeng á fundum þingnefnda Bandaríkjaþings, en slíkir fundir fara iðulega fram með fyrirfram ákveðnum spurningum og svörum.
„Þú veist bara nákvæmlega ekkert um hvað þú ert að tala,“ gaukaði Fauci jafnframt að þingmanninum.
Myndband af atvikinu má sjá hér að neðan: