Táningsbræður frá bænum Somerset í New Jersey-fylki Bandaríkjanna, hafa verið ákærðir fyrir manndráp eftir að lögregla kom að þeim að fela lík úti í skóg. Ástæðan fyrir því að lögreglunni tókst að góma bræðurna var sú að þeir skyldu eftir hættuljósin (e. hazard lights) á bifreið sinni. New York Post greinir frá þessu.
Hinn nítján ára gamli Anthony Gamble, og hinn sautján ára gamli Joshua Gamble, eru nú í gæsluvarðhaldi vegna málsins. Báðir þeirra munu fara fyrir dóm líkt og um fullorðna, sakhæfa menn sé að ræða. Það voru lögregluþjónar í Pennsylvaníu-fylki sem handtóku þá nálægt smábænum Richland.
Bræðurnir fóru á vettvang á tveimur mismunandi bílum. Þeir lögðu úti í vegkanti og settu á hættuljósin. Lögreglu bar óvænt að garði og ákvað að kanna bílana betur, en lögregluþjónanna grunaði að árekstur hefði átt sér stað. Þá sáu þeir yngri bróðurinn liggjandi á jörðinni, í hönskum og í blóðugum skóm. Hann var handtekinn, og í kjölfarið sást hinn bróðirinn hlaupa að bílnum sínum, sem tókst ekki, en lögreglan náði honum. Sá var einnig klæddur í hanska og blóðug föt.
Í kjölfarið gerði lögreglan leit á svæðinu og fann lík í skóginum og stóran hníf í öðrum bílnum. Bræðurnir hafa nú báðir verið ákærðir fyrir morð, glæpsamlegt samsæri, og vörslu morðvopns.