Maðurinn hefur verið nefndur „Somertonmaðurinn“. Jarðneskar leifar hans voru grafnar upp á miðvikudaginn til að reyna að leysa þessa rúmlega 70 ára gömlu ráðgátu. Nine Network skýrir frá þessu.
Lík mannsins fannst þann 1. desember 1948 á Somerton Beach. Andlátið var talið grunsamlegt og rannsókn hófst strax en lögreglunni tókst ekki að komast að hver maðurinn var. Ferðataska var hjá líkinu. Búið var að klippa merkimiðana af fötunum sem voru í henni. Í henni var einnig pappír með óskiljanlegu pári, sem talið er að hafi verið dulmál, og ljóðabók. Einnig var blaðsíða, sem hafði verið rifin úr sjaldgæfri bók, sem á stóð „Tamam Shud“ en það þýðir „Því er lokið“.
Besta vísbending lögreglunnar var miði með símanúmeri en það reyndist tilheyra eldri konu sem bjó nærri þeim stað þar sem líkið fannst. En konan gat ekki veitt neinar upplýsingar sem gátu varpað ljósi á hver maðurinn var. Í júní 1949 var hann jarðsettur í nafnlausri gröf í Adelaide.
Nú er vonast til að nútímatækni geti orðið til að leysa málið og því var kistan grafin upp á miðvikudaginn og það sem eftir er af líkinu flutt til réttarmeinafræðinga sem munu rannsaka líkamsleifarnar. Vonast er til að hægt verði að fá DNA úr þeim sem verði síðan hægt að nota til að finna ættingja mannsins. „Jafnvel þótt okkur takist að fá DNA úr líkinu er ekki öruggt að við finnum ættingja,“ sagði Anne Coxon, prófessor við réttarmeinafræðideildina í Adelaide, í samtali við Nine Network.
Það var vegfarandi sem fann Somertonmanninn en hann sá einhvern liggja á ströndinni og fór að kanna málið. Ekki tókst að finna dánarorsökina á sínum tíma en margar kenningar hafa verið settar fram í gegnum tíðina um hver maðurinn var og hvernig hann dó. Sumir telja að hann hafi veri njósnari en aðrir telja líklegt að hann hafi verið forsmáður elskhugi. „Það hefur verið rætt um að hann hafi verið rússneskur njósnari, að hann hafi stundað viðskipti á svarta markaðnum eða hafi verið sjómaður,“ sagði Des Bray, yfirlögregluþjónn, í samtali við Nine Network. Hann benti á að þrátt fyrir að margar kenningar hafi verið á lofti þá viti enginn sannleikann í málinu.
