Kirsty Barton hafði áhyggjur að þriggja ára dóttir sín, Amelia Bates, væri með Covid-19 því hún hafði vaknað nokkra morgna í röð með mikinn hausverk. Þar sem hausverkur getur verið einkenni Covid-19 ákvað Kirsty að fara með dóttur sína í skimun. Skimunin skilaði neikvæðri niðurstöðu og þá hófust áhyggjurnar af alvöru. Manchester Evening News fjallaði um málið.
Læknarnir hófust handa við að greina hina ungu Ameliu. Þegar Amelia hafði verið með stanslausan hausverk og kastað upp reglulega í þrjár vikur ákváðu læknarnir að setja hana í heilaskanna. Þá komst í ljós að Amelia var að glíma við mun skæðari sjúkdóm en Covid-19.
Amelia var nefnilega með sjaldgæft krabbamein innan í heilanum og ljóst var að hún átti skurðaðgerðir og marga mánuði af meðferð framundan. Krabbameinið var fundið í nóvember á síðustu ári en við það snérist líf fjölskyldunnar á hvolf. Lyfin sem hún þarf að taka vegna þess gerir ónæmiskerfi hennar afar veikt og því hefur hún ekki mátt fara úr húsi í afar langan tíma.
Þessa stundina safnar fjölskyldan fyrir leikföngum í garðinn þeirra svo Amelia og bróðir hennar Kael, sem er sjö ára og einhverfur, geti leikið sér saman heima hjá sér undir berum himni.