Hvað á fólk að fara oft í sturtu? Eflaust eru skiptar skoðanir um þetta. Sumir fara í sturtu eða bað einu sinni á dag, aðrir oftar og enn aðrir sjaldnar. En hvað segja sérfræðingar um þetta?

Eftir því sem Nada Elbuluk, læknir og prófessor við húðsjúkdómadeild Keck School læknadeildarinnar við University of Southern California, segir þá er rétt að fara í sturtu daglega eða annan hvern dag.

Þetta getur þó verið breytilegt á milli einstaklinga að hennar sögn. Til dæmis skipti daglegar venjur fólks máli, hvað það vinnur við, hvar það á heima og hvort það stundi líkamsþjálfun. CNN skýrir frá þessu.

Hún segir að við förum í sturtu til að skola af okkur olíu, húðfrumur, svita, bakteríur og skít. Ef þetta fær að byggjast upp á húðinni getur það valdið því að bólur spretta fram og jafnvel bakteríu- eða sveppasýkingum.

Hún sagði að fyrir fólk sem hættir til að fá bólur sé gott að fara í sturtu að líkamsrækt lokinni, það geti komið í veg fyrir bólumyndun. Þetta sé sérstaklega mikilvægt ef viðkomandi sé með andlitsfarða á sér á æfingu.

Hún segir að það sé einnig gott fyrir þá sem eru með viðkvæma eða þurra húð að fara í sturtu nokkrum sinnum í viku til að draga úr þurrkinum, kláða og bólgum.

Hún sagði einnig að það sé mikilvægara að beita réttum aðferðum í sturtu en að fara oft í sturtu. Nota eigi volgt vatn (ekki heitt), ekki vera lengur en í 10 mínútur og ekki nota húðhreinsiefni nema húðsjúkdómalæknir mæli með því.