Farþegar breska flugfélagsins British Airways verða nú að venja sig við breytt ávarp frá áhöfnum flugvéla félagsins. Nú má ekki lengur segja „ladies and gentlemen“ (dömur mínar og herrar) eins og gert hefur verið áratugum saman.

The Telegraph segir að nú eigi áhafnirnar að nota hlutlausari ávörp en þetta er gert til að fylgja tíðarandanum hvað varðar félagsleg viðmið. Áður hafa flugfélög á borð við Lufthansa, EasyJet og AirCanada tekið upp þessa sömu reglu.

Fyrir nokkrum vikum tilkynnti Air Malta að flugmenn félagsins muni framvegis notast við ávörp á borð við: „Takið eftir allir farþegar“ í stað kynjaðra ávarpsforma.

Martin Sorrell, sérfræðingur á flugmarkaði, gaf lítið fyrir þessar breytingar í samtali við The Telegraph og sagði að ávörpin skipti farþega nær engu máli. Það sem skipti þá máli sé maturinn, netsambandið, þjónustan og hversu hratt þeir komast inn í flugvélarnar og frá borði aftur.