Lyn Jenkins, ferðaþjónustufrömuður í Wales, vill að hið fræga Stonehenge verði flutt frá Englandi til Wales og gert að ferðamannastað þar en milljónir manna skoða þetta sögufræga mannvirki árlega. Stonehenge stendur á Salisbury Plain í England en sérfræðingar telja að steinarnir, sem voru notaðir í verkið, hafi verið teknir úr Preseli fjöllunum í Wales og fluttir til Salisbury Plain.

ITV skýrir frá þessu. Jenkins skrifaði lesandabréf í dagblaðið the Western Telegraph nýlega þar sem hann sagði að Stonehenge væri ferðamannastaður sem aflaði milljóna punda í tekjur árlega.

Hann sagði jafnframt að Boris Johnson, forsætisráðherra Bretlands, myndi kannski benda á að Englendingar hafi ekki fengið steinana því England, eins og það er í dag, hafi aðeins verið til í um 1.500 ár en Stonehenge er um 5.000 ára gamalt, en það breyti engu.

Velskir þjóðernissinnar hafa hrundið undirskriftasöfnun af stað á netinu þar sem þeir krefjast þess að steinunum verði skilað til Wales því það myndi gagnast Wales vel efnahagslega og félagslega.