Mengun frá raforkuverum, ökutækjum og öðrum tækjum sem nota jarðefnaeldsneyti átti sök á fimmtungi allra dauðsfalla á heimsvísu 2018. Það er loftmengunin frá jarðefnaeldsneytinu sem veldur þessu.

Þetta eru niðurstöður nýrrar rannsóknar. The Guardian skýrir frá þessu. Fram kemur að í þeim löndum, þar sem mest er notað af jarðefnaeldsneyti til að knýja verksmiðjur, heimili og ökutæki, látist flestir af völdum loftmengunar. Í Bandaríkjunum og Evrópu var eitt af hverjum tíu dauðsföllum af völdum mengunar. Í austanverðri Asíu var um eitt af hverjum þremur dauðsföllum af völdum mengunar, Kína telst þar með. Í Suður-Ameríku og Afríku var hlutfallið mun lægra.

Þetta er mun hærra hlutfall en áður hafði verið talið og koma rannsakendum á óvart. „Við vorum í fyrstu mjög hikandi þegar við fengum niðurstöðurnar, en við eru sífellt að uppgötva meira og meira um áhrif mengunar,“ er haft eftir Eloise Marais, landfræðingi við University College of London, sem er meðhöfundur rannsóknarinnar.

Fleiri létust af völdum loftmengunar 2018 en af völdum reykinga og malaríu til samans.

Vísindamenn hafa sýnt fram á tengsl á milli loftmengunar, af völdum jarðefnaeldsneytis, og hjartasjúkdóma, öndunarfæraörðugleika og jafnvel blindu. Ef notkun jarðefnaeldsneyta yrði hætt myndi meðalaldur á heimsvísu hækka um rúmlega eitt ár.