Sex manneskjur hafa horfið í og við smábæinn Idyllwild í Kaliforníu-fylki, Bandaríkjunum, frá því í mars á þessu ári. Frá þessu greina bandarískir miðlar, t.d. og CBS og Fox. Síðari miðillinn hefur þó greint frá því að tvær af þessum manneskjum séu fundnar, þó að ekkert sé vitað um ástand þeirra.
Idyllwild er í smábær í San Jacinto-fjallgarðinum. Þar búa um það bil 3.800 manns.
Fimm konur og einn karl hafa horfið. Þann fjórða mars síðastliðinn hvarf hinn 52 ára gamli Roy Prifogle. Hann var í fjallgöngu, en sneri ekki aftur. Leitarteymi leitaði hans í sex daga og fann á endanum bakpokann hans og bíl, hvort á sínum staðnum. Leitinni var síðan hætt þann fimmtánda mars. Fjölskylda Prifogle efast um að hann sé á lífi.
Þann sjöunda júní var síðan tilkynnt um að hin 65 ára gamla Lydia Abrams væri týnd. Lögregla leitaði að Abrams á búgarði hennar í nokkra daga, árangurslaust. Hún sást síðast þann 6. júní við fjallgöngu-miðstöð við Idyllwild.
Tilkynnt var um hvarf hinnar 41 árs gömlu Melissu Lane þann fimmtánda júní. Fram kemur að hún hafi ætlað að ganga frá Idyllwild yfir í Pine Cove, annan smábæ í nágrenninu. Þá hafi sími hennar og aðrar eigur verið eftir hjá kærasta hennar í Idyllwild.
Hin 74 ára gamla Rosario Garcia hvarf frá heimili sínu þann sjöunda júlí síðastliðinn. Bíll hennar fannst níunda júlí. Lögreglan hefur sagt að mögulega þjáist Garcia af Alzheimer-sjúkdómnum.
Jade Kemerer, 35 ára, var í Idyllwild til að láta gera við bílinn sinn, sem hafði bilað er hún ætlaði að fara heim til sín til Ohio. Hún skráði sig af gististað sínum þann 22. júlí, sama dag og fjölskylda hennar heyrði síðast í henni. Nú hefur hún hins vegar fundist, en ekkert er vitað um ástand hennar.
Tilkynnt var um hvarf hinnar 27 ára gömlu Vanessu Vlasek þann 31. júlí. Síðast var vitað af henni í Idyllwild. Hún hefur þó líkt og Kemerer fundist án þess að nokkuð hafi verið gefið upp um ástand hennar.
Lögreglan hefur fullyrt að ekkert gefi til kynna að þessi mál tengist, en hún hefur verið harðlega gagnrýnd fyrir að upplýsa almenning ekki meira um málin, enda hefur mikil skelfing gripið um sig hjá íbúum Idyllwild.
Margar getgátur eru á lofti um þessi mál og halda margir íbúar í bænum og í nágrenni við hann að ekki geti verið um tilviljanir að ræða, sérstaklega hvað varðar mál kvennanna. Dóttir Roy Prifogle, mannsins sem hvarf í mars, segir að eflaust sé þarna eitthvert illmenni að verki og spyr: „Hvað vill hann þessum konum?“
Málin eru enn til rannsóknar.
