Sky skýrir frá þessu. Abbas, sem er frá Nígeríu, var ekki einn að verki því grunur leikur á að hann sé félagi í skipulögðum glæpasamtökum sem hafi svikið háar fjárhæðir út úr fólki um allan heim.
Hann er þekktur á samfélagsmiðlum undir notendanafninu Ray Hushpuppi. Lögreglan í Dubai birti myndband af handtökunni en á upptökunni sjást lögreglumenn ryðjast inn í hús Abbas þegar hann var í fastasvefni. Auk hans voru nokkrir grunaðir samverkamenn hans handteknir.
Abbas hefur verið iðinn við að birta myndir af sér og þotulífinu sem hann lifði. Ferðaðist hann um í einkaþotum, verslaði í dýrustu merkjavöruverslunum og stundaði samkvæmislífið af krafti. 2,4 milljónir manna fylgdu honum á Instagram. Lögreglan segist hafa getað fylgst með ferðum hans með því að fylgja honum á Instagram.
Abbas og samstarfsmenn hans eru grunaðir um að hafa blekkt fyrirtæki til að leggja fé inn á reikninga glæpamanna með því að komast inn í tölvupóstsendingar fyrirtækjanna en það er vel þekkt aðferð svikahrappa. Einnig urðu einstaklingar fyrir barðinu á glæpamönnunum. Abbas er einnig grunaður um umfangsmikið peningaþvætti.
Bandaríska dómsmálaráðuneytið segir að Abbas og félagar hafi haft í hyggju að þvætta hundruðir milljóna dollara og stela 100 milljón pundum frá liði í ensku úrvalsdeildinni í knattspyrnu. Nafn félagsins er ekki gefið upp.
