Í umfjöllun New York Times um eitt þeirra, Elmhurst Hospital Center, kemur vel fram hversu mikið álag er á sjúkrahúsið og hversu hrikalega erfiðar aðstæður hjúkrunarfólkið starfar við þessa dagana. Ashley Bray, 27 ára, starfar sem læknir á sjúkrahúsinu. Á þriðjudaginn varð hún að beita hjartahnoði á þrjá sjúklinga smitaða af COVID-19. Þeir létust allir í höndunum á henni. Kona á níræðisaldri, karlmaður á sjötugsaldri og 38 ára karlmaður. Þennan dag létust 13 sjúklingar á sjúkrahúsinu af völdum veirunnar.
Bray segir ástandið á sjúkrahúsinu jafnast á við „heimsendi“. En það er kannski ekki það versta því allt bendir til að ástandið eigi enn eftir að versna. Andrew Cuomo, ríkisstjóri í New York, hefur sagt að þess sé vænst að ástandið verði verra í apríl en í mars og að maí verði hugsanlega enn verri. Núna eru 53.000 sjúkrarúm í ríkinu en Cuomo telur þörf á 140.000 þegar faraldurinn nær hámarki.
Samkvæmt skjölum sem New York Times hefur fengið aðgang að stefnir í að gjörgæsludeildir ríkisins fyllist í þessari viku. Einnig kemur fram að reiknað sé með að líkhúsin fyllist á sama tíma.
Cuomo hefur sagt að mikilvægast sé að fá fleiri öndunarvélar, þörf sé á 30.000 vélum en 11.000 séu til staðar í ríkinu. Alríkisyfirvöld hafa brugðist við þessu með að senda sjúkraskip til New York en í því er rými fyrir 1.000 sjúklinga. Skipið kemur þó ekki á áfangastað fyrr en um miðjan apríl.