Bill Gates, annar stofnandi Microsoft, ætlar að hætta í stjórn fyrirtækisins til að geta eytt meiri tíma í að sinna mannúðarmálum. Hann hyggst beina sjónum sínum að heilbrigðismálum um allan heim og þróunarstarfi, menntun og loftslagsbreytingunum.

Gates, sem er 65 ára, er einn af auðugustu mönnum heims. Hann er einnig hættur í stjórn Berkshire Hathaway, fjárfestingafyrirtækis auðjöfursins Warren Buffett.

Gates hætti afskiptum af daglegum rekstri Microsoft 2008 en hefur síðan setið í stjórn fyrirtækisins. Í tilkynningu frá Gates segir að fyrirtækið muni alltaf vera mikilvægur hluti af ævistarfi hans og að hann muni áfram styðja við stjórnendur þess.