Um það bil 80 kóalabjörnum hefur verið bjargað af svæðinu og njóta þeir nú aðhlynningar. Fréttirnar af dauða dýranna kom í kjölfarið á því að þúsundir kóalabjarna urðu skógareldunum, sem herjað hafa á Ástralíu að undanförnu, að bráð. Kóalabirnir eru á lista yfir viðkvæmar dýrategundir hjá ástralska umhverfisráðuneytinu.
Samkvæmt umhverfisverndarsamtökunum Friends of Earth Australia bárust fréttir af því, eftir skógarhöggið í desember, að hundruðir kóalabjarna væru að svelta í hel. Samtökin greindu einnig frá því að svo virðist sem fólk hafi orðið vitni að því að dýrunum hafi verið mokað í hrúgur með jarðýtum.
Það var íbúi, Helen Oakley, á svæðinu sem fyrst vakti athygli á málinu, en hún deildi myndbandi á Facebook þar sem hún sagðist hafa séð dauða kóalabirni á svæðinu. Hún sagði að Ástralía ætti að skammast sín fyrir þetta.
Dýraverndunarsamtökin Animals Australia segjast hafa sent mannskap á svæðið til þess að reyna að bjarga eins mörgum dýrum og hægt væri. Fulltrúar samtakanna segjast enn vera að safna gögnum sem tengjast málinu og að allt útlit sé fyrir að fjölmörg lög hafi verið brotin og að samtökin muni hvetja yfirvöld til þess að sækja þá sem bera ábyrgð á þessu til saka.
Ekki liggur ljóst fyrir hvaða fyritæki stóð fyrir skógahögginu. Samkvæmt skógarhöggsiðnaðinum var öllum reglum fylgt þegar trén voru felld. Samtökin Animals Australia segja þó að það sé alveg ljóst að lög hafi verið brotin.