Í umfjöllun Sky um málið kemur fram að áður hafi komið fyrir bylgjur sem hafi endurtekið sig en aldrei í líkingu við þessar hér sem endurtaka sig reglulega á 16 daga fresti. Eins og með aðrar útvarpsbylgjur af þessu tagi er ekki vitað hvað veldur þeim en helstu kenningarnar eru að hér sé um að ræða merki frá einhverju sem snýst hratt, til dæmis nifteindastjörnum eða svartholum.
Vísindamenn, sem rannsökuðu gögn frá útvarpssjónauka sem the Canadian Hydrogen Intensity Mapping Experiment notaði, sáu að hraðar útvarpsbylgjur höfðu borist til jarðarinnar tvisvar á klukkustund í fjóra daga áður en þær hættu. Þær byrjuðu síðan aftur 12 dögum síðar. Uppruni þeirra var rakinn til miðlungsstórrar vetrarbrautar í um 500 ljósára fjarlægð. Aldrei fyrr hafa útvarpsbylgjur af þessu tagi borist frá vetrarbraut svo nærri jörðinni.
Vísindamennirnir fóru yfir 409 daga tímabil og sáu að sendingarnar endurtóku sig með reglubundnum hætti. Þeir telja hugsanlegt að þær eigi uppruna sinn hjá hlut sem er á braut um eitthvað og fer hring á 16 dögum. Það verður þó að hafa í huga í því samhengi að bylgjur af þessu tagi eru mjög aflmiklar, senda mikið af rafsegulorku frá sér. Þær gætu því verið frá nifteindastjörnu en ef svo væri mætti búast við að hringrásin væri ekki svona stöðug.