Lyfjafyrirtækið Johnson & Johnson tilkynnti í nótt að það hafi gert hlé á tilraunum með bóluefni gegn kórónuveirunni, sem veldur COVID-19, vegna óútskýrðra veikinda eins þátttakandans. Í tilkynningu fyrirtækisins kemur fram að nú sé verið að rannsaka veikindi viðkomandi.

Samhliða rannsókn fyrirtækisins á veikindum viðkomandi mun óháð eftirlitsnefnd fara yfir rannsóknina og veikindi þátttakandans.

Fyrirtækið hefur því lokað fyrir skráningar sjálfboðaliða til þátttöku í tilraunum með bóluefnið en auglýst var eftir 60.000 sjálfboðaliðum.

Tilraunin með bóluefnið er komin á þriðja stig sem er lokastigið fyrir hugsanlega samþykkt lyfjaeftirlitsstofnana á bóluefninu.

Það er ekki óalgengt að hlé sé gert á tilraunum með bóluefni. Í september gerði lyfjafyrirtækið AstraZenecas hlé á tilraunum með hið svokallaða Oxfordbóluefni eftir að grunur vaknaði um alvarlegar aukaverkanir hjá einum þátttakendanna. Tilraunir hófust síðan nokkrum dögum síðar og standa enn yfir.

Johnson & Johnson hefur ekki viljað veita frekari upplýsingar um hin óútskýrðu veikindi þátttakandans. Fyrirtækið er meðal þeirra lyfjafyrirtækja sem hefur samið við bandarísk stjórnvöld og bóluefnasamstarf ESB um aðgengi að bóluefni fyrirtækisins ef það reynist virka.