Í fyrsta sinn í átta ár hefur fækkað í hópi Pólverja sem búa og starfa utan heimalandsins. Meðal ástæðna þess er að barnabætur hafa verið hækkaðar, ungt fólk greiðir lágan skatt og laun hafa hækkað. Þetta hefur virkað og pólskir ríkisborgarar flytja aftur heim.

Samkvæmt nýjustu tölum frá pólsku hagstofunni fækkaði pólskum ríkisborgurum, sem búa utan heimalandsins, um 85.000 árið 2018. Nú búa tæplega 2,5 milljónir Pólverja utan heimalandsins. Financial Times skýrir frá þessu.

Tölurnar verða einnig að skoðast í því ljósi að það eru ekki eingöngu Pólverjar sem flytja heim því færri flytja úr landi en áður og því hefur þessi fækkun orðið. Pólskur efnahagur stendur vel, það er góður hagvöxtur, skortur á vinnuafli og þá sérstaklega í byggingariðnaði. Laun eru einnig ágæt en það kann að koma mörgum á óvart. Samkvæmt tölum frá Eurostat, tölfræðistofnun ESB, er kaupmáttur launa meiri í Póllandi en hann er í norrænum borgum á borð við Kaupmannahöfn og Stokkhólm.

Í Þýskalandi búa nú um 706.000 Pólverjar og eru hvergi fjölmennari utan landsteinanna. 2018 fækkaði Pólverjum í Bretlandi um 98.000 frá 2017. Ástæðan er Brexti og sú óvissa sem þá ríkti um þróun mála.