Árásin átti sér stað í afskekktum hluta Ngäbe-Buglé svæðisins, en þar er stórt samfélag innfæddra Panamamanna.
Fórnarlömbin voru drepin vegna þess að þau iðruðust ekki synda sinna segir Rafael Baloyes, saksóknari á svæðinu. Hann telur að söfnuðurinn hafi verið virkur í um þrjá mánuði, en hafi ekki valdið neinum skaða fram að þessu. Árásin átti sér stað þegar meðlimir safnaðarins voru þess vissir að viðkomandi hefði fengið skilaboð frá Guði.
Lögreglan réðist inn í húsnæði safnaðarins og bjargaði 15 manneskjum, sem voru næstar í röðinni til að vera drepnar, segir í yfirlýsingu frá saksóknaranum. Á staðnum fundust næg sönnunargögn til þess að tengja þau níu sem handtekin voru við morðin, meðal þess sem fannst voru sveðjur og önnur verkfæri sem lögreglan telur að hafi verið notuð við morðin. Einn hinna handteknu var afi eins myrtu barnanna. Söfnuðurinn kallar sig „Kirkju Guðs“. Baloyes segir að þrátt fyrir rannsókn á svæðinu hafi ekki fundist fleiri fórnarlömb.