Breski sjónvarpsmaðurinn Sir David Attenborough segir að loftslagsvandinn sé staðreynd og skilur ekki hvers vegna er ekki gripið til nauðsynlegra ráðstafana. Hann segir að nú þurfi að grípa til aðgerða, tíminn sé orðinn krítískur.

BBC skýrir frá þessu. Meðalhitastig á jörðinni hefur hækkað um eina gráðu að meðaltali og segir Attenborough að augljóst samhengi sé á milli þessarar hlýnunnar og gróðureldanna í Ástralíu.

„Suðaustur Ástralía logar. Mörg þúsund manns þjást. Þurfum við fleiri sannanir?“

Ef ríki heims halda áfram að losa gróðurhúsalofttegundir út í andrúmsloftið í sama mæli og þau gera í dag mun meðalhitastigið á jörðinn líklega hækka enn frekar á næstu 80 árum og verða um þremur gráðum hærra en áður var. Loftslagssérfræðingar hafa miklar áhyggjur af þessu og segja að ef hitinn hækkar um 1,5 gráður muni það hafa í för með sér mikil flóð og hitabylgjur og öfgafyllra veðurfar.

„Í 30 ár hef ég sagt að það liggi á en við höfum enn tíma til að snúa þessu við. Þeim mun lengur sem við bíðum, þeim mun erfiðara verður þetta.“

Sagði Attenborough sem sagði að næstu tvö til þrjú ár verði mjög mikilvæg. Yngri kynslóðirnar skilji að hér sé raunveruleg ógn á ferð en eldri kynslóðirnar átti sig ekki á umfanginu.

„Kynslóðin mín hefur klúðrað þessu. Unga fólkið skilur að alvarleg vandamál steðja að ef við gerum ekki breytingar.“