Á þessu tímabili voru orustuflugmenn við æfingar á svæðinu en í þeim sáu sumir þeirra undarlega fljúgandi furðuhluti. Hluti sem gerðu hluti í loftinu sem er ekki hægt að gera með þeirri tækni sem við ráðum yfir.
Flugmennirnir tilkynntu þetta fyrst til yfirmanna flotans og byrjuðu þeir að skrá þessa undarlegu atburði því svipaðir atburðir höfðu gerst 2005 og því var ákveðið að skrá þetta kerfisbundið.
En ekkert frekar var aðhafst í málinu og verkefnið fór fram með algerri leynd. Fyrir tveimur árum birti New York Times umfjöllun um málið og ræddi við nokkra flugmenn sem lýstu því sem þeir höfðu séð og þá fór boltinn að rúlla.
Í september á síðasta ári viðurkenndi Pentagon að málið væri á rökum reist. Ráðuneytið hefði mikið af myndefni af þessu. Myndefni sem var tekið upp með innrauðum myndavélum flugvélanna.
Í greininni segja flugmennirnir meðal annars frá því að þeir hafi séð hluti sem snerust og fóru á móti vindi. Engir sýnilegir hreyflar voru á hlutunum, þeir skildu ekki neina slóð eftir sig og flugu hraðar en þekkist. Sumir þeirra hreyfðust líka á vegu sem á ekki að vera hægt. Til dæmis stöðvaðist einn þeirra mjög snöggt og jók síðan hraðann úr kyrrstöðu upp í gríðarlegan hraða á örskotsstundu.
Samkvæmt umfjöllun The Times hefur þetta vakið áhyggjur í Bandaríkjunum.
„Ef ég á að vera alveg heiðarlegur þá er kannski best, ef þetta er eitthvað, að þetta komi frá annarri plánetu frekar en að vera merki um tækniþróun Rússa og Kínverja, eitthvað sem við ráðum ekki yfir.“
Sagði Marco Rubio þingmaður frá Flórída og meðlimur í leyniþjónustunefnd þingsins.
Pentagon hefur nú ákveðið að setja rannsóknarnefnd á laggirnar sem á að rannsaka málið. Nú þegar hafa stjarneðlisfræðingar rætt við nefndina um „fljúgandi furðuhluti utan úr geimnum“.
Rannsóknarnefndin á að bæta skilning okkar og veita betri innsýn í hvaða hlutir þetta eru. Markmiðið er finna, greina og skrá þessa hluti og meta hvort þeir eru ógn við þjóðaröryggi, segir meðal annars í tilkynningu frá Pentagon. David Nordquist, varavarnarmálaráðherra er formaður nefndarinnar.
Frá 2007 til 2012 fór leynileg rannsókn fram á þessum hlutum en henni var hætt vegna niðurskurðar. Luis Elozondo, sem stýrði þeirri rannsókn, sagði upp störfum 2017 til að mótmæla niðurskurðinum og leyndinni sem hvíldi yfir rannsókninni. Þá sagði hann:
„Þessi loftför, köllum þau loftför, geta ýmislegt sem Bandaríkin geta ekki. Þetta geta önnur ríki ekki heldur, eftir því sem við best vitum. Þetta eru ansi sannfærandi sannanir fyrir að við erum ekki ein.“
