35 eldri borgarar hafa látist af völdum COVID-19 veirunnar á Life Care Center í Kirkland sem er í útjaðri Seattle í Washington í Bandaríkjunum. Talið er að fólkið hafi smitast af starfsfólki sem hélt áfram að vinna þrátt fyrir að vera sjálft veikt af völdum veirunnar.

10 létust á dvalarheimilinu í gær og var fjöldi látinna þar þá kominn upp í 35. Af þeim 150, sem hafa látist af völdum veirunnar í Bandaríkjunum til þessa, eru 65 frá Washington. LA Times skýrir frá þessu. Fram kemur að 81 íbúi hafi greinst með veiruna, 34 starfsmenn og 14 gestir.

Bandaríska smitsjúkdómastofnunin CDC hefur rannsakað starfsemi dvalarheimilisins og komist að því að margir starfsmenn voru við störf þrátt fyrir að hafa verið veikir. Margir þeirra unnu á fleiri stöðum til að hafa í sig og á.