Gríðarlegur munur er á kynjunum þegar kemur að tekjuhæsta fólkinu í evrópska bankageiranum. Staðan er enn þá verri í fjárfestingarbönkum.
Þetta kemur fram í umfjöllun breska tímaritsins The Banker og er byggt á gögnum frá evrópsku bankastofnuninni, EBA.
Í gögnunum kemur fram að af þeim sem græða mest, það er fá að minnsta kosti eina milljón evra í þóknanir, eru 90,7 prósent karlar.
Eins og gefur að skilja er þessi hópur ekki fjölmennur, aðeins 2016 einstaklingar. 1833 eru karlar en aðeins 183 konur.
Staðan er verri í fjárfestingarbönkum. Af 325 tekjuhæstu einstaklingunum eru 314 karlar en aðeins 11 konur. Karlar eru því 96,6 prósent en konur aðeins 3,4.
Þrátt fyrir að þessi hópur sé ekki stór þá hefur hann stækkað mjög hratt á undanförnum árum. Fyrir tíu árum, árið 2014, voru aðeins 939 einstaklingar sem höfðu svo háar þóknanir. Mesta fjölgunin var á árunum 2021 og 2022.