Melanie Lugini heitir konan og vegna fötlunar getur hún ekki farið sjálf út að versla í matinn. Melanie býr í Bretlandi og hefur verslað við Iceland þar í landi í mörg ár og nýtt sér heimsendingarþjónustuna þeirra. Hún flutti nýverið frá Sheffield til Leicester en í nýja húsinu er skortur á bílastæðum. Það hefur orðið til þess að sendlarnir hafa ekki komið með vörurnar upp að dyrum þar sem þeir finna ekki stæði.
Melanie sendi kvörtun til Iceland vegna þessa. „Þeir hafa neitað að koma með vörurnar upp að dyrum svo ég kvartaði,“ sagði Melanie í samtali við LeicestershireLive. „Síðan þá hafa sendlarnir verið ókurteisir og óvægnir svo ég sendi aðra kvörtun. Síðasti sendillinn sem kom hingað sagði að hann vildi ekki koma með vörurnar til mín því hann vildi ekki eiga á hættu að fá sekt fyrir að leggja ólöglega. Þegar hann kom síðan með vörurnar sagði hann að ef hann fengi sekt þá þyrfti ég að borga fyrir hana.“
Þá sagði sendillinn við Melanie að ef hann þyrfti að koma aftur með sendingu til hennar þá þyrfti hún að fara út og sækja vörurnar, annars fengi hún þær ekki. Eftir síðustu kvörtun hennar var henni sagt að verslunarstjórinn myndi hafa samband við hana til að ræða um málið. Nú hefur þó vika liðið síðan þá og enginn hefur haft samband.
Talsmaður Iceland segist harma það að upplifun Melaine sé þessi. „Við munnum finna lausn á þessu á næstunni,“ sagði talsmaðurinn.