Fyrir um 80.000 árum gekk lítill hópur neanderdalsmanna um þar sem nú er Le Rozel í Frakklandi. Þetta vitum við því vísindamenn hafa fundið 257 vel varðveitt fótspor eftir þá. Þessi fótspor veita sjaldgæfa innsýn í líf þessarar manntegundar sem er nánasti ættingi okkar eða var því hún er útdauð.

The Guardian hefur eftir Jérémy Deveau, sem vann að rannsókninni, að sporin veiti nákvæma mynd af lífi einstaklinga í örskotsstund.

Það sem kom vísindamönnunum mest á óvart var að hópurinn samanstóð af allt að 14 einstaklingum en þar af voru bara einn eða tveir fullorðnir. Flestir voru á unglingsaldri og börnin voru niður í tveggja ára gömul. Ekki hafa áður fundist sannanir fyrir að svo mörg börn væru í hópum neanderdalsmanna. Fyrri rannsóknir hafa sýnt að þeir lifðu yfirleitt í 10 til 30 manna hópum þar sem flestir voru fullorðnir.

Ekki er talið útilokað að hópar neanderdalsmanna hafi verið mjög ólíkir enda náði búsetusvæði þeirra allt frá Síberíu í austri til Vestur-Evrópu. Tegundin var einnig uppi í minnst 200.000 ár og margt gæti hafa breyst á þeim tíma.

Niðurstöður rannsóknarinnar hafa verið birtar í vísindaritinu PNAS.