Í byrjun febrúar varð hin fimm ára Tafida Raqeeb, sem býr í vesturhluta Lundúnaborgar, fyrir alvarlegum heilaskaða í kjölfar sjúkdóms í æðum. Hún hefur legið í öndunarvél á Royal London Hospital síðan. Læknar þar, sem hafa ráðfært sig við aðra sérfræðinga á Englandi og á Ítalíu, telja að hún sé algjörlega meðvitundarlaus og að ekki sé útlit fyrir neinn bata og því eigi að stöðva læknismeðferð hennar. Það þýðir að slökkva þarf á öndunarvélinni sem mun hafa í för með sér að hún mun væntanlega deyja innan klukkustundar.
En foreldrar hennar eru ósátt við að læknismeðferð Tafida verði hætt. Af þeim sökum hefur sjúkrahúsið nú farið með málið fyrir dóm til að fá gera það sjúkrahúsið segir vera „stúlkunni fyrir bestu“.
Foreldrar Tafida, Shelima Begum og Mohammed Raqeeb, hafa einnig farið með málið fyrir dóm. Þau hafa verið í sambandi við sjúkrahús í Genoa á Ítalíu sem þau segja að geta haldið Tafida á lífi. Þau vonast til að Tafida geti náð einhverjum bata þar. Þau hafa einnig fært rök fyrir að það brjóti gegn trúarsannfæringu þeirra, þau eru múslimar, ef Tafida verður látin deyja. Þá halda því þau einnig fram að það brjóti gegn rétti Tafida til frjálsar farar innan ESB ef hún fær ekki að fara til Genoa. Lögmaður þeirra segir að málið sé „versta martröð allra foreldra“. Hann hefur fyrir dómi varpað þeirri spurningu fram að ef það sé mögulegt að hægt sé að halda Tafida á lífi eða að hún taki jafnvel smá framförum „af hverju fær hún þá ekki tækifæri til þess?“.
Málið hefur vakið mikla athygli í Bretlandi en svipuð mál hafa komið þar upp á undanförnum árum. Eitt umtalaðasta málið snerist um kornabarnið Charlie Gard sem þjáðist af mjög sjaldgæfum sjúkdómi, sem aðeins 16 börn í heiminum þjáðust af, sem gerði að verkum að hann átti enga möguleika á að lifa af. Í því máli varð sjúkrahúsið að fara með málið fyrir dóm til að fá heimild til að slökkva á öndunarvélinni.
Foreldrar Charlie áfrýjuðu dómnum en þau vildu að Charlie fengi að fara til Bandaríkjanna þar sem hægt væri að gera tilraun á honum með nýja læknismeðferð. Þau töpuðu málinu einnig fyrir hæstarétti og reyndu þá að áfrýja málinu til Mannréttindadómstóls Evrópu en hann hafnaði því að taka málið fyrir. Margir blönduðu sér í málið, þar á meðal Frans páfi sem sagði að sjúkrahús í Róm gæti haldið meðferðinni áfram og Donald Trump, Bandaríkjaforseti, sem lýsti yfir stuðningi við foreldrana. Charlie Gard lést skömmu fyrir eins árs afmæli sitt.
