Lögregluyfirvöld í Lundúnum leita nú hjólreiðamanns sem réðist á gangandi vegfaranda í miðborginni á dögunum. Atvikið náðist á eftirlitsmyndavél en á myndbandi má sjá þegar hjólreiðamaðurinn fer yfir á rauðu ljósi og hjólar utan í vegfaranda sem er að ganga yfir umrædda götu.
Svo virðist vera sem hjólreiðamaðurinn hafi gjörsamlega misst stjórn á skapi sínu við þetta, því stuttu síðar sést þegar hann gengur upp að vegfarandanum og skallar hann af miklu afli í höfuðið.
Í fréttum breskra fjölmiðla kemur fram að sauma hafi þurft nokkur spor í höfuð vegfarandans. Þá tognaði maðurinn illa þegar hann féll til jarðar.
Lögreglan birti myndbandið í þeirri von að einhver myndi bera kennsl á hjólreiðamanninn.