Sex eru látnir eftir að byssumaður hóf skothríð á spítala í Tékklandi í morgun. Maðurinn sem grunaður er um verknaðinn gengur enn laus og hefur lögregla birt mynd af honum, að því er segir í frétt Sky News.
Lögregla fékk tilkynningu um málið klukkan sjö í morgun að staðartíma, en árásin var framin í borginni Ostrava í austurhluta Tékklands.
Lögregla er með mikinn viðbúnað á svæðinu og hefur spítalinn verið rýmdur.
Adam Vojtech, heilbrigðisráðherra Tékklands, hefur látið hafa eftir sér í fjölmiðlum í morgun að um „mikinn harmleik“ sé að ræða.