Það er stundum sagt að blóð sé þykkara en vatn. Þetta orðatiltæki hefur sérstaklega mikla þýðingu fyrir hjónin Staci og James Maneage frá Missouri í Bandaríkjunum. Þau áttu í miklum erfiðleikum með að eignast börn en óvænt breyttist það eftir margra ára tilraunir og þau eignuðust þrjá syni, Matthew, Kyle og Andrew.

En áður en þau eignuðust drengina hafði James lofað Staci að þau myndu ættleiða barn til að uppfylla draum sinn um að eiga börn. Þessu gleymdi Staci ekki og var staðráðin í að þau myndu ættleiða barn. Allt frá því að hún var ung að árum hafði hana dreymt um að ættleiða barn frá Kína. Fyrir nokkrum árum komst hún í samband við Hakka-fólkið sem er minnihlutahópur í Kína og þekkti því nokkuð til þess hóps.

2010 var hringt í hana frá ættleiðingarstofu og henni sagt að munaðarlausa stúlku, af ættum Hakka, vantaði öruggt og ástríkt heimili. Það fylgdi sögunni að stúlkan væri með heilasjúkdóm en það hafði engin áhrif á ákvörðun hjónanna sem fóru til Kína og sóttu stúlkuna sem fékk nafnið Ellianna. Hún þurfti að dvelja töluvert á sjúkrahúsi eftir komuna til Bandaríkjanna en var mjög sátt við að hafa verið ættleidd af ástríkri fjölskyldu.

Ótrúlegar líkar

Á sama tíma ættleiddu önnur hjón úr sama bæ unga fatlaða stúlku frá Kína. Hjónin eru í sama söfnuði og Maneage-hjónin. Sú stúlka fékk nafnið Kinley en hún er þremur árum yngri en Ellianna. Hún býr hjá Paige og Steve Galbierz ásamt líffræðilegum börnum þeirra.

Fjölskyldurnar bjuggu í aðeins þriggja mínútna göngufjarlægð frá hvor annarri og stúlkurnar kynntust fljótlega og urðu bestu vinkonur en þær gengu í sama skóla. Foreldrar þeirra undruðust hversu líkar þær voru. Þau vissu að þær komu frá sitt hvorum bænum en gátu ekki annað en hugleitt hvort þær væru skyldar. En þar sem Kínverjar eru rúmlega einn milljarður fannst þeim líkurnar ekki miklar á að þær væru skyldar en þó ekki útilokað.

Að lokum ákváðu Maneage-hjónin að þau gætu ekki búið lengur við þessa óvissu og yrðu að komast að sannleikanum. Þau ræddu þetta við Galbierz-hjónin sem féllust með semingi á að senda Kinley í DNA-rannsókn með Ellianna.

Niðurstaða rannsóknarinnar var afgerandi því 99,9 prósent líkur eru á að þær séu systur af holdi og blóði. Það verður að teljast ótrúlegt að miðað við aldursmuninn á þeim og að þær bjuggu í sitt hvorum bænum, sem mörg þúsund kílómetrar eru á milli, höfðu þær nánast endað sem nágrannar í Bandaríkjunum.

Systurnar.