Flugstjórar og flugmenn þurfa að fylgja ströngum reglum í starfi sínu enda bera þeir ábyrgð á fjölda mannslífa meðan á flugi stendur. Flugstjóri einn í Kína fær aldrei að fljúga aftur eftir að mynd fór í dreifingu á samfélagsmiðlum.
Í frétt breska blaðsins Independent er umrædd mynd birt en þar má sjá konu sitja í sæti flugstjórans. Svo virðist vera sem myndin hafi verið tekin meðan vélin var í loftinu af sjálfum flugstjóranum, en um er að ræða flugvél kínverska flugfélagsins Air Guilin. Myndin var tekin þann 4. janúar síðastliðinn en fór í dreifingu á samfélagsmiðlum nýlega.
Forsvarsmenn Air Guilin tóku málið alvarlega og hafa yfirvöld nú afturkallað réttindi flugstjórans til að fljúga. Er hann sagður hafa brotið gróflega gegn lögum sem banna flugstjórum að hleypa farþegum um borð í flugstjórnarklefann.