Nauðgunin átti sér stað í húsi, sem ekki er búið í, í Sandviken. Þar safnaðist fjöldi ungmenna saman til að grilla og skemmta sér. Mikil áfengisneysla var á staðnum. Stúlkan, sem var ekki orðin 18 ára sagði fyrir rétti að hún hefði rætt við mann í partýinu og hefðu þau ákveðið að stunda kynlíf og hafi farið inn í herbergi í húsinu.
Hún sagði að þegar inn var komið hafi maðurinn lagt hana í rúmið og þá hafi hinir tveir mennirnir komið inn. Þetta hafi verið mjög óþægilegt því myrkur hafi verið í herberginu og síðan hafi fjórði aðilinn komið inn og notað farsímann sinn til að lýsa herbergið upp.
Hún sagði að skyndilega hafði allt orðið mjög óþægilegt þarna í herberginu. Einhver hefði reynt að færa hana úr buxunum, tveir hefðu haldið henni fastri. Hún sagðist hafa barist á móti en árangurs því hendur hafi verið að þreifa á og taka á öllum líkama hennar.
Þremenningarnir, sem voru sakfelldir, beittu hana síðan allir kynferðislegu ofbeldi á mismunandi hátt.
„Ég veit ekki hver gerði hvað.“
Sagði stúlkan fyrir dómi samkvæmt frétt Aftonbladet.
Eftir nokkra stund komu tvær stúlkur inn og báðu mennina að hafa sig á brott. Þeir urðu æstir við það og fóru að slást.
Málið hefur haft mikil áhrif á stúlkuna sem hefur átt erfitt með nám eftir þetta og gat um langa hríð aðeins sótt skóla í tvær klukkustundir á viku. Hún þurfti einnig að nota svefntöflur til að geta hvílst.
Mennirnir héldu því fram fyrir dómi að stúlkan hefði sjálfviljug stundað kynlíf með þeim. Í dómsniðurstöðu segir að þetta sé ótrúverðug skýring og beri þess öll merki að þeir hafi komið sér saman um hana eftirá.
Mennirnir höfðu aldrei fyrr komist í kast við lögin. Einn þeirra var 18 ára þegar þetta gerðist og hinir tveir voru nýorðnir 19 ára.
Saksóknari krafðist þriggja ára fangelsis yfir þeim en þingréttur féllst ekki á það og dæmdi þá í þriggja mánaða fangelsi og bar við að þeir eigi engan sakaferil að baki og séu ungir að árum.