Á mánudaginn hófust réttarhöld í undirrétti í Næstved í Danmörku. 32 ára grunnskólakennari er ákærður fyrir að hafa ítrekað nauðgað, brotið kynferðisleg á annan hátt og haft í hótunum við nemanda sinn, stúlku, á árunum 2017 og 2018 þegar hún var 13 og 14 ára.

Í frétt Danska ríkisútvarpsins um málið kemur fram að hinn ákærði hafi ítrekað káfað á stúlkunni í tengslum við íþróttakennslu og nauðgað henni. Saksóknari krefst þess að hann verði sakfelldur fyrir nauðgun og annað kynferðisofbeldi. Hann er einnig ákærður fyrir að hafa þuklað á þremur öðrum stúlkum.

Saksóknari krefst þess að sérstöku ákvæði hegningarlaganna verði beitt við ákvörðun refsingar mannsins en þetta ákvæði nær yfir sérstaklega hættulegar nauðganir og getur allt að 12 ára fangelsi legið við brotum á því. Maðurinn neitar sök.

Samkvæmt ákæruskjalinu hótaði maðurinn stúlkunni að hann myndi myrða fjölskyldu hennar ef hún gerði ekki það sem hann bæði hana um. Hann sagði stúlkunni að hann væri fyrrverandi hermaður og meðlimur í leynilegum samtöku fyrrum hermanna sem myndu sjá um að myrða fjölskyldu hennar og hana sjálfa ef hún skýrði frá ofbeldinu. Danska ríkisútvarpið segir að maðurinn sé fyrrum hermaður.