Í Noregi er ekki farið leynt með hvað fólk hefur í tekjur því árlega er skattskráin opinberuð en í henni er hægt að sjá tekjur allra Norðmanna. Fáir eru undanskildir og  ekki einu sinni allir konungbornir sleppa við tekjubirtingu. Skattskrá síðasta árs var birt fyrir nokkrum dögum. Fjölmiðlar hafa að vonum fjallað um hana og þar á meðal um tekjur Mörthu Lovísu elsta barns konungshjónanna.

Hún hefur frá 2007 rekið svokallaðan englaskóla með Elisbeth Nordeng. Í gegnum árin hafa þær þénað milljónir á að kenna og flytja fyrirlestra um englatrú sína en á síðustu misserum hafa tekjurnar dregist umtalsvert saman segir í umfjöllun seher.no.

Fram kemur að 2017 hafi tekjur Mörthu Lovísu verið 1,87 milljónir norskra króna en á síðasta ári voru þær 600.000 krónur. Á sama tíma hafa eignir hennar rýrnað töluvert eða úr 4,9 milljónum 2017 niður í rétt rúmlega 2 milljónir á síðasta ári.

Ekki er skýrt frá tekjum og eignum konungshjónanna eða krónprinsins.