Bandaríska alríkislögreglan, FBI, segir að Samuel Little, 79 ára karlmaður, sem var handtekinn árið 2012 sé afkastemsti raðmorðingi í sögu Bandaríkjanna. FBI sagði frá þessu á vef sínum í gær um leið og stofnunin óskaði eftir upplýsingum frá borgurum um sum morðanna.
Little hefur játað á sig 93 morð á árunum 1970 til 2005 og telja sérfræðingar FBI að þessar játningar séu ekki úr lausu lofti gripnar. Raunar séu þær trúverðugar og FBI hafi nú þegar staðfest sannleiksgildi 50 þeirra og rannsóknir fleiri mála séu á lokametrunum.
Fórnarlömb Little voru nær allt konur sem margar voru illa staddar félagslega, neyttu fíkniefna eða stunduðu vændi. Christine Palazzolo, fulltrúi FBI, segir að Samuel hafi talið að hann kæmist upp með glæpi sína því enginn myndi sakna fórnarlamba hans.
FBI hefur biðlað til almennings um aðstoð við að sannreyna nokkrar játningar Samuels og hefur stofnunin birt nánari útlistun á þeim málum á vef sínum.
Samuel var dæmdur í lífstíðarfangelsi án möguleika á reynslulausn fyrir aðeins þrjú morð árið 2014. Við réttarhöldin neitaði hann sök en í fyrra ræddi hann við lögreglu og játaði þá á sig tugi morða.