Kviðdómur í Wisconsin í Bandaríkjunum hefur fellt þann úrskurð að James Fetzer, einn þeirra sem neitað hafa því að fjöldamorðin í Sandy Hook-barnaskólanum áttu sér stað, þurfi að greiða föður sex ára pilts sem lést í skólanum 450 þúsund dali, jafnvirði 56 milljóna króna.

Byssumaður myrti 26, þar af fjölmörg ung börn, í skólanum í Newtown í Connecticut þann 14. desember 2012. Einn þeirra sem lést var Noah Pozner, sex ára sonur Leonard Pozner.

Fetzer þessi hélt því fram að atburðarásin í skólanum hefði verið sviðsett og skrifaði hann, ásamt Mike Palacek, bók sem bar heitið: Nobody Died at Sandy Hook. Í bókinni reyndu þeir að færa rök fyrir því að atburðarásin í Sandy Hook hefði verið sviðsett af ríkisstjórn Baracks Obama til að herða byssulöggjöfina í Bandaríkjunum.

Leonard Pozner höfðaði mál í kjölfarið en í bókinni var því meðal annars haldið fram að hann hefði falsað dánarvottorð sonar síns. Pozner hefur barist hatrammlega gegn þeim sem hafa afneitað atburðarásinni í Sandy Hook og hefur hann þurft að gjalda það dýru verði. Samsæriskenningasmiðir hafa hótað honum lífláti, hann sagður vera leikari og því haldið fram að sonur hans hafi aldrei verið til.