Læknir í Virginíuríki í Bandaríkjunum, Joel Smithers, hefur verið dæmdur í 40 ára fangelsi fyrir að skrifa út lyfseðla fyrir ópíóíðalyf. Alls skrifaði hann út 500 þúsund skammta á innan við tveimur árum á læknastofu sinni í Martinsville, en íbúar þar eru einungis 13 þúsund.

Lögregla fékk veður af málinu árið 2017 og var húsleit gerð í kjölfarið. Margir af skjólstæðingum hans voru meðal annars langt leiddir fíkniefnaneytendur sem neyttu lyfjanna sjálfir eða einstaklingar sem seldu þau áfram fyrir hagnað. Mörg þessara lyfja voru mjög sterk, til dæmis fentanyl og oxycodone. Talið er að minnst ein kona hafi látist vegna lyfja sem Joel ávísaði fyrir hana.

Jesse Fong, einn af yfirmönnum fíkniefnalöggæslunnar í Bandaríkjunum (DEA), segir að Joel hafi í raun verið stórtækur dópsali. Hann hafði læknastofu sína stundum opna fram að miðnætti, slík var eftirspurnin eftir lyfjum. Talið er að hann hafi haft um 700 þúsund dali, um hundrað milljónir króna, upp úr krafsinu.

Joel neitaði sök í málinu og sagði skjólstæðinga sína hafa leikið á sig; hann hafi treyst fólki sem hann hefði ekki átt að treysta. Thomas Cullen, saksóknari Bandaríkjanna, segir að refsingin, 40 ára fangelsi, sé sanngjörn. Líklegt má telja að dómnum verði áfrýjað.