Nú eru 314 dagar síðan síðast sást til Anne-Elisabeth Hagen á lífi. Henni var rænt af heimili sínu í útjaðri Osló þann 31. október síðastliðinn. Lögreglan hefur ekki gefið upp vonina um að geta leyst málið en telur þó litlar líkur á að Anne-Elisabeth sé enn á lífi. Anne-Elisabeth er gift Tom Hagen sem er einn auðugasti maður Noregs. Lausnargjalds var krafist fyrir hana en ekkert hefur heyrst frá henni frá deginum örlagaríka í lok október.

Í gær skýrði lögreglan frá því að hún hefði þrengt hringinn hvað varðar mögulega gerendur í málinu. í lok ágúst skýrði lögreglan frá því að skófar eftir skó af gerðinni Sprox hafi fundist nærri heimli Hagen-hjónanna. Lögreglan telur að skófarið geti verið eftir einn af þeim sem rændi Anne-Elisabeth. Skórnir eru líklega af stærðinni 45.

Lögreglan leitar nú að eiganda skóparsins og segist lögreglan nú verið búin að þrengja hringinn. Í fyrstu vissi lögreglan um 300 skópör af þessari tegund sem höfðu verið seld í Spar Kjøb. Nú er búið að minnka fjöldann niður í 260 skópör að sögn Tommy Brøske sem stýrir rannsókninni.

Á fréttamannafundi í lok ágúst lýsti lögreglan eftir upplýsingum um alla sem hefðu keypt sér skó af þessari tegund frá því í ágúst 2016 fram í maí 2018 í Spar Kjøb. Nú hefur komið í ljós að skór sem þessir voru seldir í verslunum Spar Kjøb allt þar til daginn áður en Anne-Elisabeth var rænt.

Ef lögreglunni tekst að finna eiganda umrædds skópars gæti það þýtt stóran sigur í rannsókn málsins.