Breska fjármálaráðið – Office for Budged Responsibility (OBR) – spáir mjög dökkum horfum í bresku efnahagslífi ef Bretar ganga úr ESB án samnings. Spáir stofnunin að verg þjóðarframleiðsla dragist saman um 2% fyrir lok árs 2020, atvinnuleysi aukist og laun lækki. Viðvaranir í þessa átt hafa verið uppi allt frá því að Bretar samþykktu í þjóðaratkvæðagreiðslu að ganga út úr ESB sumarið 2016. Farið er yfir dökkar tölur í skýrslu ráðsins á vefnum Metro og víðar.
Theresa May forsætisráðhera var í tvígang gerð afturreka með samninga við ESB um útgöngu, sem voru kolfelldir í þinginu. Af þeim sökum hefur hún sagt af sér formennsku í breska íhaldsflokknum og lætur ef embætti forsætisráðherra um leið og eftirmaður hennar er fundinn. Formannskosningar í íhaldsflokknum eru framundan og eru yfirgnæfandi líkur á því að Boris Johnson, fyrrverandi borgarstjóri London, verði formaður og þar með forsætisráðherra. Hann hefur gefið í skyn að hann vilji hóta ESB samningslausri útgöngu til að fá betri samning.
Breska pundið hefur fallið mjög undanfarna daga í skugga óvissunnar um Brexit og hefur ekki verið lægra síðan í september 2017. Sjá hér.