Eins og DV skýrði frá í gær þykjast sumir sjá að það sé ekki tilviljun að bókin og greinin skella á Trump á sama tíma og að þetta sé upphafsatriðið í vel útfærðri áætlun um að koma honum frá völdum.
Það þarf varla að fjölyrða um að forsetatíð Trump hefur verið allt annað en laus við ringulreið en fréttir þessarar viku af forsetanum og stjórnarháttum hans hafa kynt enn frekar undir fréttum og sögum af stjórnleysinu sem virðist ríkja í Hvíta húsinu og þeirri miklu valdabaráttu sem þar fer fram.
Washington Post hefur birt útdrátt úr bók Woodward en hann er blaðamaður hjá blaðinu. Woodward er áhrifamikill og þekktur blaðamaður en það voru hann og Carl Bernstein sem afhjúpuðu Watergatehneykslið 1974 sem kostaði Richard Nixon, þáverandi forseta, embættið.
Í bókinni lýsir hann miklum klofningi í stjórn Trump og getuleysi hennar. Trump er sagður skipta stöðugt um skoðun og ráðgjafar hans reyna að halda aftur af honum með öllum tiltækum ráðum. Því er meðal annars lýst að Gary Cohn, fyrrum efnahagsráðgjafi Trump, hafi að minnsta kosti tvisvar fjarlægt skjöl af skrifborði Trump, meðal annars til að koma í veg fyrir að Trump segði upp mikilvægum viðskiptasamningi við Suður-Kóreu. Þá hefur Woodward ýmis misfögur ummæli um Trump eftir samstarfsfólki hans.
„Hann er fábjáni. Það þýðir ekkert að sannfæra hann um eitthvað. Hann er kominn út í skurð. Við erum í borg fábjánanna.“
Er John Kelly, starfsmannastjóri Trump, sagður hafa sagt. Kelly er ósáttur við þessi skrif og segir að bókin „sé enn ein ömurleg tilrauninn til að ata fólk, sem stendur Trump nærri, aur og beina athyglinni frá miklum árangri ríkisstjórnarinnar“.
