Líf sextugrar konu, Mary Rose Trinidad, breyttist á einu augabragði síðastliðinn föstudag þegar eiginmaður hennar og fjórar dætur á aldrinum 13 til 20 ára létust á sviplegan hátt.

Fjölskyldan var á ferð í Delaware í Bandaríkjunum þegar bifreið þeirra lenti í árekstri við flutningabíl. Eiginmaður Mary, Audie Trinidad, og dætur þeirra, Kaytlin, 20 ára, Danna, 17 ára og tvíburarnir Allison og Melissa, 13 ára, létust í slysinu.

Mary var flutt alvarlega slösuð á sjúkrahús en ástand hennar mun vera stöðugt og er hún með meðvitund. Hjónin voru í bílbelti en dæturnar, sem sátu aftur í, ekki.

„Við erum að reyna að átta okkur á þessu. Þau eru öll farin á einu augnabliki,“ segir Daniel Trinidad, bróðir Audie, í samtali við New York Post.

Fjölskyldan á rætur að rekja til Filippseyja en Audie flutti til Bandaríkjanna árið 1987 þar sem hann kynntist Mary. Eftir að hann flutti til Bandaríkjanna var hann hermaður í bandaríska sjóhernum í sjö ár, að því er New York Post greinir frá.