Franska lögreglan lagði gífurlega vinnu í rannsókn þessa hryllilega máls. Upplýsingar voru sendar til lögregluyfirvalda í rúmlega 30 löndum. Lögreglumenn heimsóttu tugi þúsunda franskra skóla og ræddu við mörg þúsund lækna og dagmömmur í þeirri von að finna út hver stúlkan var. En þetta skilaði engum árangri.
Enginn tilkynnti um hvarf stúlkunnar. Stúlkan, sem fékk viðurnefnið „litla hetjan frá A10″, var á endanum jarðsett í kirkjugarðinum í Suevres Loire án þess að nafn væri sett á legsteininn. Á honum stendur „Til minningar um litlu óþekktu stúlkuna frá A10 hraðbrautinni“. Málið fjaraði síðan hægt og rólega út.
Lögreglan hætti rannsókn þess formlega 10 árum síðar, málið var skráð óupplýst og gögn málsins voru sett í geymslu.
2008 tókst sérfræðingum að greina DNA litlu stúlkunnar og var það í framhaldinu skráð í franska gagnagrunninn yfir DNA. En engin tenging fannst í honum.
Málið er eitt þeirra morðmála sem franska lögreglan hefur lagt mesta vinnu í að leysa.
Þrátt fyrir að málið hafi í raun verið sett til hliðar og flokkað sem óupplýst þá gleymdi lögreglan því ekki og nú, rúmum 30 árum síðar, telur lögreglan sig hafa upplýst þetta óhugnanlega mál að sögn Le Monde.
Það stefnir því í að hægt verði að setja nafn á legsteininn.
Það var 2016 sem lögreglan fékk loks upplýsingar sem komu að gagni við lausn málsins. Þá var maður handtekinn í Villers-Cotterets í norðurhluta landsins grunaður um innbrot. DNA var tekið úr manninum og sett í fyrrnefndan gagnagrunn. Þá kom fram svörun við sýnið úr litlu stúlkunni og var niðurstaðan að maðurinn væri líklegast bróðir hennar.
Lögreglan hóf þá aftur að rannsaka málið og leita að foreldrum mannsins og þar með foreldrum litlu stúlkunnar.
Ljóst var að foreldrar þeirra áttu sjö börn samkvæmt þjóðskrá en í dag eru börnin aðeins sex. Inass, sem fæddist í júlí 1983 í Marokkó, er ekki lengur til staðar.
Á fimmtudaginn voru foreldrar hennar handtekin en þau eru grunuð um að hafa beitt Inass ofbeldi og að hafa myrt hana.
Le Monde segir að lögreglan vilji lítið segja um málið en allt bendir til að sagan um „litlu hetjuna frá A10, taki brátt enda.