fbpx
Miðvikudagur 05.október 2022

Þreyttur kattareigandi

Svarthöfði
Sunnudaginn 26. maí 2019 18:00

Ekki missa af Helstu tíðindum dagsins í pósthólfið þitt

Lesa nánar

Síðasta sumar fékk Svarthöfði sér kettling. Bröndótta læðu sem fékk nafnið Branda. Svarthöfði taldi að það væri miklu auðveldara að fá sér kött en hund. Hundar krefjast hreyfingar og mun meiri athygli sem Svarthöfði er hvorki fær né viljugur til þess að veita. Sjálfsagt var Branda tekin of fljótt frá móður sinni og hefði þurft að liggja lengur á spena, því eitthvað virðist vanta í hana.

Um haustið var kominn tími til að gelda Bröndu. Ekki vildi Svarthöfði sitja uppi með skara af kettlingum og þurfa að reyna að koma þeim út á Barnalandi. Nei, það yrði of tímafrekt. En um þetta sama leyti fór að vaxa stór og myndarlegur pungur undir Bröndu. Þetta var þá högni eftir allt saman. En það kom ekki að sök því það er ódýrara að gelda högna en læður.

Leið nú veturinn og ekki varð Brandur gáfaður þótt hann stækkaði og fitnaði. Hann var inniköttur og líkaði það illa. Svo illa að hann gapti fram af svölunum og í eitt skiptið féll hann fram af en varð þó ekki meint af. Á þeim tímapunkti festi Svarthöfði á hann ól og hleypti út í frelsið.

Brandur
Þegar hann var enn þá læða.

En þá byrjaði ballið fyrir alvöru og hefur Brandur verið Svarthöfða til eintómrar armæðu síðan. Svarthöfði fylgist stundum með honum út um gluggann og samskiptum hans við aðra ketti úr nágrenninu. Lífsreynda ketti og harða af sér. Kemur Brandur illa út úr þeim samanburði en fær þó stundum að hanga í pilsfaldinum á feitum gráum ketti úr næsta stigagangi. Sennilega vegna meðaumkunar.

Brandur stígur ekki beint í vitið og auk þess er hann algerlega áttavilltur. Ekki leið á löngu þar til Svarthöfði var farinn að sjá myndir af honum poppa upp á hverfasíðum á Facebook og símtölin fóru að berast: „Þessi köttur er búinn að setjast að hérna í garðinum hjá mér og vill ekkert fara!“

Ekki nóg með að Brandur angri nágrannana því einnig hefur hann truflað skólastarf barnanna í nágrenninu. Í eitt skipti óð hann inn í miðja kennslustund og í annað truflaði hann útikennslu í leikfimi svo að tímanum var aflýst. Einnig lætur hann leikskólabörnin ekki í friði og í eitt skipti sníkti hann hafragraut frá þeim. Þá hefur hann einnig verið að týna ólunum sínum og læsast inni í hjólageymslum.

Með því að fá sér kött vildi Svarthöfði losna við hvimleiða göngutúra. En nú þarf Svarthöfði að þramma hverfið þvert og endilangt til að leita að Brandi. Þar að auki er hann sinnulausari um húsbónda sinn en áður. Þegar hann er heima við sefur hann og safnar kröftum fyrir næsta skammarstrik. Eða hann liggur ofan á búri þar sem stjúpbræður hans, þrír gullfiskar synda, og hræðir úr þeim líftóruna.

Nei, nú er nóg komið af svartagallsrausi um hann Brand blessaðan. Þótt hann sé vitlaus getur hann verið bráðskemmtilegur og ágætis félagsskapur. Hann er barngóður og ærslafullur, forvitinn og djarfur. Þar að auki er hann hinn myndarlegasti á að líta. Að eiga dýr gefur lífinu lit og þó að kettir hafi það orð á sér að vera hrokafullir einfarar þá eru þeir hin vænstu skinn inni við beinið. Og ekki myndi Svarthöfði skipta á Brandi fyrir neitt annað dýr.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fókus
Fyrir 2 klukkutímum

Segir Harry og Meghan hafa ætlað sér að niðurlægja bresku konungsfjölskylduna með nýjum myndum

Segir Harry og Meghan hafa ætlað sér að niðurlægja bresku konungsfjölskylduna með nýjum myndum
433Sport
Fyrir 2 klukkutímum

Segir af og frá að samningar séu í höfn – Þetta er staðan sem stendur

Segir af og frá að samningar séu í höfn – Þetta er staðan sem stendur
433Sport
Fyrir 4 klukkutímum

Fjögur stór nöfn fjarverandi á æfingu United í morgun

Fjögur stór nöfn fjarverandi á æfingu United í morgun
433Sport
Fyrir 4 klukkutímum

Sjáðu myndbandið: Gæsahúð á Anfield er Trent gekk að velli – Klopp sá til þess að hann væri hylltur

Sjáðu myndbandið: Gæsahúð á Anfield er Trent gekk að velli – Klopp sá til þess að hann væri hylltur
433Sport
Fyrir 5 klukkutímum

Ofurtölvan stokkar spilin – Svona endar enska úrvalsdeildin í maí

Ofurtölvan stokkar spilin – Svona endar enska úrvalsdeildin í maí
Fréttir
Fyrir 5 klukkutímum

Enn halda landvinningar Úkraínumanna áfram – Hafa náð tugum bæja úr höndum Rússa

Enn halda landvinningar Úkraínumanna áfram – Hafa náð tugum bæja úr höndum Rússa
Fréttir
Fyrir 6 klukkutímum

Segir að svona geti stríðið endað – Pútín steypt af stóli og Rússland gliðnar í sundur

Segir að svona geti stríðið endað – Pútín steypt af stóli og Rússland gliðnar í sundur
Fréttir
Fyrir 6 klukkutímum

Kremlverjar sagðir skjálfa af hræðslu – Kvíða föstudeginum

Kremlverjar sagðir skjálfa af hræðslu – Kvíða föstudeginum