Lögreglan í Suður Afríku notaði þyrlu til þess að sækja ríkan mann sem krókódíll hafði étið. Krókódíllinn var hífður upp með manninn í maganum.
Breska blaðið The Daily Mail greinir frá þessu.
Maðurinn lést í síðustu viku þegar bíll hans festist á brú yfir fljótið Komati í austurhluta Suður Afríku. Flætt hafði yfir brúnna og bíllinn stöðvaðist á stórhættulegum stað.
Þegar lögreglumenn fundu bílinn var hann tómur og talið var að straumurinn hefði hrifsað manninn með sér. Leitarflokkar voru sendir af stað með þyrlur og dróna til að reyna að finna manninn.
Loks komu leitarmenn auga á nokkra krókódíla sem flatmöguðu á hólma í fljótinu. Snemma grunuðu þeir einn krókódílana um að hafa étið manninn.
„Auk þess að vera með stútfullan maga þá hreyfði hann sig ekki eða reyndi að komast ofan í fljótið þegar drónarnir og þyrlan komu,“ segir Johant Potgieter, varðstjóri hjá lögreglunni.
Var tekin ákvörðun um að fella dýrið og ferja það í burtu með þyrlu. Aðgerðin var þó talin mjög hættuleg.
Það var Potgieter sjálfur sem seig í bandi úr þyrlunni og batt utan um hræ krókódílsins. Var hann svo hífður upp og flogið með hann frá ánni.
Krókódíllinn, sem er 4,5 metrar að lengd og hálft tonn að þyngd, var fluttur í hinn nærliggjandi Kruger þjóðgarð. Þar var hann ristur upp og reyndust grunsemdirnar réttar. Inni í iðrum hans fundust líkamsleifar ríka mannsins sem festist á brúnni.
En það var ekki það eina sem fannst í belgnum. Þar fundust einnig sex aðrar týpur af skóm. Hvort þetta þýði að krókódíllinn hafi áður étið fólk skal þó ósagt látið.
„Krókódíll étur og gleypir hvað sem er,“ segir Potgieter.
